آنا

باخیشیندا مین حیکمت وار مین معنا

گولوشونده اوره‌ک سؤزون دیلله‌نیر.

او گولومسر دوداغیندا آی آنا

آرزولارین چیچک‌لری گول‌له‌نیر ؛

گولوشونده اوره‌ک سؤزون دیلله‌نیر

سیلینمه‌سین دوداغیندان گولوش‌لر ؛

سن گولنده اوره‌ک گولور ، گؤز گولور.

گولوشونله اوره‌ییمده نه قد‌ه‌ر –

آرزو گولور ، دیلک گولور ، سؤز گولور ؛

سن گولنده اوره‌ک گولور ، گؤز گولور .

آیریلیغین اود قالاییر سینه‌ده ؛

آلوولانیر گؤروشونه اوره‌ییم.

آرزولاریم گول آچماسا ، یئنه‌ده –

وصال عشقی گره‌ییمدیر ، گره‌ییم ؛

آلوولانیر گؤروشونه اوره‌ییم .

ایسته‌رم کی هیجران یئلی اسمه‌سین؛

چیچک دولو آرزوموزون باغینا.

بو آیریلیق قرارینی کسمه‌سین،

امید باغلا شن وصالین چاغینا ؛

چیچک دولو آرزوموزون باغینا.

غم یئمه‌کی بیزیمکی دیر گله‌جک ؛

بیر دوداق گول بلکه هیجران اوسانا.

دوداقلارین قوی آچیلسین چیچک‌تک؛

گله‌جه‌یین دان یئری تک آی آنا!

بیر دوداق گول بلکه هیجران اوسانا.

"قارا گونون عؤمرو آزدیر" – دئیرلر ؛

صاباح وصال غنچه آچار ، گول سایاق.

اولا بیلمز حیات بویو بوته‌هر

سن اوغولسوز ، من آناسیز یاشایاق ؛

صاباح وصال غنچه آچار ، گول سایاق.

۱۳۶۶